Wednesday, December 11, 2013

Geyser Gaatha

Unhone kaha "cool"
Maine kaha cool nahi cold tha
Vo pani jiss se aaj nahaana pada
Geyser kharaab tha aur college jaana tha
isiliye thande paani se kaam chalaana pada

Toh bole itni sardi mei thanda paani?
Ek din bina nahaae chalaa leti
Maine kaha sard neend badi ziddi hoti hai
Cutting chai ko bhi sulaa deti
Subah subah hosh bhulaa deti

Bole, Kuch garm piya tha uske baad?
Pi lena tha sardi lag jaegi
Maine kaha kuch der dhoop mei chali thi
Hatheli se hatheli garmaai thi
andar bujhti lau maine thande paani se jalaai thi.

Phir pucha, acha baaki din kaisa tha?
Vo tumhari dost...milne aayi thi?
Maine kaha ab din dhall gaya hai sone do
aur nahi...aaj phir sham akele sulgaai thi.
Phone toh rakh diya, par aaj bhi mujhe neend kahaan aayi thi.

Mujhe message kiya unhone,
tum jhooth bolna chor do na, tumhe aata nahi
Maine kaha, so jao kal tumhe jaana haina kahin?
tumse mujhe tanng kiya bina
bhala kyu rahaa jaata nahi?


Jawaab aaya, akele matt raha karo
log sath ho toh acha lagta hai
Galaa kas gaya, toh maine kaha
Pataa hai? aj mess mei kadhi bani thi
tum hote toh sath mei khaate, sahi bani thi

Bole baat matt badlo, batao kya hua?
mann kiya likh dun baat toh aap badal rahe hain
seh na paae jo bayaan hua?
par offline chali gayi, kaha na gaya
Agli subah phir Geyser se rahaa na gaya

Mujhe phir college jaana tha,
phir thande paani se nahaana pada



3 comments:

  1. :)
    Kahaani achchhi kehti ho tum. Achchhi hi ho na tum.

    ReplyDelete
  2. Dipalie, this is the first thing I read today morning and have a feeling that the day will be good now.

    Tumhara andaaz-e-bayaan hai suhaana bada,
    Shukr hai tumhe thande pani se nahana pada.
    Tumhari mithaas ghul jaati hai har lafz mein,
    Shayad isi wajah se hai diabetic zamana bada.

    Keep up the awesome lines.

    ReplyDelete
  3. This is soooo sooo beautiful!
    "andar bujhti lau maine thande paani se jalaai thi." meri favorite lines! bahut khoob! reading you is essential, now. :D

    ReplyDelete